د ښار په کچه د ښځو شورای ښه خدمتونه په ځانګړې توګه د هغه ښځو چې،د بیرغ په ملي ورځ یې د خیاطی هنر له لارې ملي بیرغونه ګلدوزي کړي وو، د کابل ښاروالۍ له لوري په ستاینلیکونو او ډالیو ونازول شوې. دکابل ښاروالۍ د کلتوري چارو معین سر څیړونکي محمد فاضل شریفي په یادو مراسمو کې وویل،چې کابل ښاروالي په لویو پریکړو کې د ښځو رول مهم ګڼي او تاکید کوي چې،ښځې په خپل جوړونکي لید لوري او د ټولنیزو لویو مسئولیتونو په لرلو سره کولای شي د ټولنې په رغونه او ښاري ستونزو ته د رسیدلو په برخه کې خپل رول ولوبوي.نوموړي وویل، د ښځو شوراګانې چې له کابل ښاروالۍ سره د پلانونو په پلي کیدو او ښاري ستونزو په مشخصوالي کې مرسته کوي د ستایلو وړ دي. نوموړي ژمنه وکړه چې د امکان تر بریده به د ښځو ستونزو ته جدي پاملرنه وکړي څو وکولای شي په ښاري مدیریت کې خپل رغنده رول په ښه توګه وښيي.
