د کابل ښاروالۍ د عوایدو ۱۵۰ بستونو لپاره ازاده لکنیزه سیالۍ د پنجشنبه په ورځ د تلې په ۱۷ نېټه په زرنګار پارک کې په کاملا شفافه توګه د کابل ښاروالۍ د مالي او اداري چارو د مرستیال ښاغلي نظیف الله قلندرزي تر څارنې لاندې واخیستل شوه. په یاده سیالۍ کې ټولټال ۷۰۰ کسانو برخه اخیستې وه ؛ د کابل ښاروالۍ د مالي او ادراي چارو مرستیال ښاغلي نظیف الله قلندرزي چې له ازموینې یې څارنه کوله وویل، چې یادو بستونو ته د کاري وړتیا درلوونکو او ژمنو کسانو ګمارل لازمي دي، څو ورسره د یاد بنسټ عواید په شفافه ټوګه راټول شي او په اړوند یې منظم او دقیق راپور ورکړل شي. نوموړي کسانو په ګمارلو کې د مسئولیت منلو پر حس او هیوادنۍ پر شتون ټینګار وکړ او زیاته یې کړه چې د شفافه توګه د عوایدو راټولول د کابل ښاروالۍ لومړیتوب دی. کابل ښاروالۍ رهبري د شفافیت او مسلکیتوب اصل ته په کتو هڅه کوي په یادو بستونو کې مسلکي او تخصصي کسان په دندو وګمارل شي ، څو خدمات په ګټوره او کار وړ توګه وړاندې شي. د یادونې وړ ده چې په تیرو دوو میاشتو کې دا دویمه آزاده تاریخي سیالۍ ده چې د عوایدو د خالي بستونو لپاره په پوره شفافه فضا کې اخیستل کیږي او ګډونوال پکې بې سارې توګه په پوره اعتماد او ژمنتیا ګډون کوي.
