د کابل ښاروالۍ په وړاندیز او د ولسمشرۍ عالي مقام له منظورۍ سره سم ، ښاغلي اشناګل بانډوال په لومړی بست کې د کابل ښاروالۍ د بشري سرچینو د نوي رئیس په توګه وټاکل شو او د تلې په ۲۳ نېټه د کابل ښاروال ښاغلي محمد داود سلطانزوی له لوري خپلو همکارانو ته ور وپیژندل شو. په یادو مراسمو کې کابل ښاروال وویل چې، تغیر او تبدیل په ادارو کې یو اصل دی او په ښاروالۍ کې د تغیر او وضعیت ښه والي لپاره ژمن دی چې یو شمیراصلاحات راولي ، څو له یوې خوا تخصص او کاري وړتیا اصل په نظر کې نیول شوی وي له بل لوري ښاریانو ته ګټور خدمات وړاندې شي. د یادونې وړ ده، چې ښاغلي باڼدوال په حقوقو او سیاسي علومو کې د لیسانس تر کچې زده کړې لري او په مدیریتي برخو کې یې ۱۵ کاله په بیلابیلو ادارو کې د امریت او ریاست تر کچې دندې پر مخ وړې دي.