په کابل کې میشتو د غزني ولایت مشرانو له کابل ښاروال څخه د سرغړونو پر وړاندې د غوره مبارزې او ښاري نظم او قانون پلي کیدو له امله ملاتړ اعلان وکړ او د نوموړي خدمتونه یې وستایل. دوی څرګنده کړه، چې کابل ښار د ټولو افغانانو اړوند دی او دوی به په ګډه لاس په لاس د پروګرامونو په تطبیق او په ټولو یو شان د قانون په پلي کیدو او د عمراني او فرهنګي کارونو په ترسره کولو کې له کابل ښاروالۍ سره مرسته کوي. یادو مشرانو د کابل د زرغونتیا،عمراني پروژو په تطبیق او د خلکو اړتیاو ته په کتو د پلانونو جوړولو په برخه کې د کابل ښاروال له کارونو ستاینه وکړه او خپلې ستونزې یې له کابل ښاروال سره شریکې کړې. دوی بې پلانه د کابل ښار پراختیا،قانون ماتونه او د خدماتو په وړاندې کولو کې د خلکو نه همکاري عمده ستونزې په ګوته کړې. ورته مهال کابل ښاروال په خپلو خبرو کې وویل چې،د ټولنیز عدالت د تامین،اقتصادي پرمختیا او د ښاري فرهنګ د ژوندي کولو لپاره جدي تصمیم او پلانونه لري چې په بیلابیلو پړاونو کې به پلي شي. کابل ښاروال زیاته کړه چې، د دوی نظرونه او وړاندیزونه به په خپلو راتلونکو فعالیتونو او پلانونو کې په نظر کې ونیسي او زیاته یې کړه چې د خلکو له لوري د دوی د خدمتونو ستاینه ورته مثبته انرژي ورکوي، څو نور هم هڅه وکړي او د ښار د آبادۍ په برخه کې خپلې هڅې نورې هم ګړندۍ کړي.
