په ټولو د قانون د یو شان تطبیق او حاکمیت په اړوند، نن د لړم په دریمه نېټه د کابل ښاروال ښاغلي محمد داود سلطانزوی په مشرۍ او د ۲۲ ناحیو د رئیسانو په ګډون د مخکنیو تدابیرو نیولو په موخه غونډه ترسره شوه. په غونډه کې کابل ښاروال یو ځل بیا د ښاري نظم عملیاتي پلان پر تطبیق ټینګار وکړ او دغه راز یې له مافیا ، قانون ماتوونکو او نورو ډلو چې ښاري نظم یې زیانمن کړی مبارزه اړینه وبلله او زیاته یې کړه چې:(( نور په دنده کې ناغیړي د کابل ښاروالۍ او خلکو لپاره د منلو نه ده ، او ژر دې د غیر قانوني تاسیساتو جوړونکو او د زرغونو سیمو او پلو لارو غاصیبنو مخنیوی وشي)). کابل ښاروال د ښاري نظم عملیاتي پلان پر وړاندې د ناحیو د رئیسانو مکلفیتونه او دندې واضح کړې او زیاته یې کړه چې له سرغړونکو سره دې جدي قانوني چلند وشي او لازم اقدامات دې ترسره شي. د ښاري نظم عملیاتي پلان تطبیق په ټولو ناحیو کې د اجرا په حال کې دی او په بیلابیلو پړاونو کې به د لنډمهاله، منځمهاله او اوږدمهاله حمایوي او تقویتي پروګرامونو په ترسره کولو سره د کابل ښاروالۍ او پولیسو په پوره همغږۍ تطبیق شي او د لاسي توکو پلورونکو او سیارو کراچیو ستونزې ته به د پای ټکی کیښودل شي. کابل ښاروال یو ځل بیا له هغه کسانو چې په پلو لارو او عامه ځایونو کې یې تاسیسات جوړ کړي دي غوښتنه وکړه چې فعالیتونه یې د کابل ښاروالۍ د لایحې سره سم تنظیم کړي او له غیر قانوني تاسیساتو جوړولو او ودانیزو سرغړونو څخه ډډه وکړي.
