کابل ښاروالۍ د بارانونو په راتلونکي موسم کې د ځمکې د سطحې د اوبو د مديريت په موخه د روانې اونۍ د شنبې له ورځې ور هاخوا د تنظيف رياست له لوري د زياد شمېر هغو ويالو او لښتيو د پاکولو چارې پيلوي چې له بده مرغه د ښار يو شمېر اوسېدونکو د کثافاتو په غورځولو سره بند شوي دي. په دې سره به د بارانونو په موسم کې د ځمکې د سطحې د اوبو ستونزې حل شوې وي. دا په داسې حال کې ده چې د کابل ښاروالي همېشه د ښار د ويالو او لښتيو د پاکۍ او نظافت په هڅه کې ده او تمه ده چې د ښار اوسېدونکي د خپلې هوساينې په موخه له تنظيفي کارکوونکو سره همکاري او د ښار په ويالو او لښتيو کې د کثافاتو له اچولو ډډه وکړي. دا همکاري به د دې جوګه شي چې د تنظيفي کارکوونکو له اوږو څخه د ښار د پاک کارۍ دروند بار يو څه کم او ښاري کلتور به مو په پام کې نيولی وي.
