کابل ښاروالي د لاسي توکو پلورونکو د فعالیت او بوختیاوو موندلو په برخه کې د پروګرامونو د په لاره اچولو په لټه کې ده. په لومړی ناحیه کې ناقانونه د پیسو اخیستلو پیښې په ګوته او ورته رسیدنه وشوه، معلومه شوه چې ۴ مافیايي کسانو ناقانونه پیسې اخیستې او د یادې ناحیې په یو شمیر برخو کې یې سړکونه او پلې لارې په ناقانونه توګه غصب کړې دي او له ۵۰۰ زیاتې غرفې او کپې یې هیوادوالو ته په کرایه ورکړې دي. کابل ښاروالي د داسې ناقانونه پیسو اخیستو او د پایداره ښاري نظم په موخه، د لاسي توکو پلورونکو د مصئون فعالیت ازمایښتي طرحه د نوو او غوره لارو چارو په سنجولو او د ځانګړي او غیر متحرک ډیزاین کراچیو د ویش پروګرام تر لاس لاندې لري چې د پلو لارو او سړکونو د بندیدو سبب به نه ګرځي. په دې کار سره به له یوه لوری د لاسي توکو پلورونکو د فعالیت لپاره غوره او مصئونه زمینه برابره شي او له بل لوري به په ښاري نظم ګډوډولو کې د مافیايي کړیو مخه ونیول شي او ناقانونه پیسې اخیستل به بند شي. هغه هیوادوال چې د لاسي توکو پلورونکي دي، له دې وروسته کابل ښاروالي د دوی د مصئون فعالیت ملاتړ کوي. لاسي توکي پلورونکي باید د ښاري بې نظمۍ سبب ونه ګرځي او غلطه ګټه اخیستونکو کسانو ته پیسې ورنه کړي.