کابل ښاروالۍ څه موده وړاندې د پارک ګولايي په زرغونه سیمه یا د کابل باغچه کې د یو رستورانټ او نورو ناقانونه تاسیساتو په نړولو کار پیل کړ،خو له دې کبله چې په دې سیمه کې فعالیت کوونکو خپل مالونه لیږدول دا کار وځنډول شو. د یادې سیمې د بشپړې پاکونې په موخه د یادې ادارې پرسونلو ته دنده ورکړل شوه،څو د خنډونو پاتې شونې په بشپړه توګه له منځه یوسي او ولیږدوي. دا کار به ښکلا ته د برابرولو په موخه تر راتلونکو دوه ورځو پورې دوام ومومي. یاده زرغونه سیمه د واټ په مینځ کې ده چې،تر اوسه ترې ناسمه او ناقانونه ګټه پورته کیده او د ښاري بې نظمۍ او په ورڅیرمه سړکونو کې د ګڼې ګوڼې ډیریدو سبب ګرځیدلې وه. کابل ښاروالي ژمنتیا لري،څو د کابل په ټولو سیمو کې ښاري نظم رامنځته کړي او په دې برخه کې به د امنیتي سرتیرو په مرسته جدي ګام اخلي.
