د معلوماتو شریکولو او د کثافاتو په مدیریت کې د ښځو له تجربو د ګټې اخیستنې په موخه د کابل ښاروالۍ له لوري د اروپايي ټولنې په مرسته په څلورمه ناحیه کې د عامه پوهاوي پروګرام پلی شو. په دې پروګرام کې د کابل ښاروالۍ د ټولنیزو او کلتوري چارو مرستیال سرڅیړونکي محمد فاضل شریفي په ټولنه کې د ښځو د ونډې په اړه خبرې وکړې او زیاته یې کړه،په هغه توګه چې ښځې د ټولنې په ټولنیزو مسایلو کې فعاله دي او غوره رول لوبوي،دغه راز کثافاتو په مدیریت په ځانګړې توګه د پخلنځي او چاپیریالي کثافاتو په بیل والي کې هم د ښار د پاکۍ په موخه هم غوره چارې ترسره کولای شي. نوموړي زیاته کړه چې ښځې کولای شي د کثافاتو په مدیریت کې له موږ سره په ګډه ګټورې چارې ترسره کړي، څو کابل په یو پاک او با فرهنګه ښار بدل شي. په یاد پروګرام کې د دې سربیره په کورنیو کې د اوبو پّ مدیریت، د کثافاتو په مدیریت او دغه راز د پلاستیک د ناوړه زیانونو په اړه خبرې وشوې او ښځې وهڅول شوې څو د کثافاتو د کچې په راټیټيدو کې مرسته وکړي. د پروګرام په پای کې د غونډې ګډونوالو ته د وچو کثافاتو د مدیریت او بیلا والي په اړه معلوماتي بستې هم وړاندې شوې.
