د دولسمې ناحیې اړوند د ملالۍ څلور لارې سیارې کراچۍ او لاسي توکي پلورونکي یو ځل بیا تنظیم او ځای پر ځای شول او د یادې څلور لارې فرعي سړکونه د ښاري بسونو او د لیږد وسایلو پر مخ خلاص او آماده شول. دغه راز له کمپلکس روغتون تر بتخاک کلي پورې د ودانیزو توکو پلورونکو لکه ریګ پلورونکو،کرش،سمنټ پلورونکو،خښتو پلورونکو او نورو ته وخت ورکړل شو،څو هر څه ژر دا سیمې پریږدي. په همدې توګه بتخاک او مرکزي محبس ته نیږدې په استملاکي سیمو کې په خپل سر او د کابل ښاروالۍ له اجازې پرته جوړې شوې ودانۍ ونړول شوې او دې لویې ښاري سرغړونې ته رسیدنه وشوه. د یو شمیر هټیو مخې ته ناقانونه رغونې چې پلې لارې یې بندې کړې کړې وې ونړول شوې او سرغړونکي یې جریمه شول او دغه راز د یو شمیر سرغړونکو هټۍ مهرلاک شوې. ښاري نظم د ټولو ښاري اصولو او قواعدو په مراعات پورې اړه لري چې اقتصادې ودې او ټولنیزې سوکالۍ ته زمینه برابروي.
