د کابل ښاروالۍ د ټولنیزو او کلتوري چارو مرستیال څیړنوال محمد فاضل شریفي، د ۲۲ ګونو ناحیو د ګذر وکیلانو شورا له رئیسانو سره د ملي دسترخوان پروګرام د بستو ویش په اړه د یوې ناسته په ترڅ کې بحث او خبرې اترې وکړې. ښاغلي شریفي په دې برخه کې له ګذر وکیلانو د همکارۍ غوښتنه وکړه او زیاته یې کړه چې دوی کولای شي د ښاري ستونزو په برخه کې ګټور نظریات او وړاندیزونه وړاندې کړي. د ګذر وکیل د خلکو او مسئولانو ترمنځ د نښلونکي پله حیثیت لري او د کمکي بستو د ویش له څرنګوالي څخه د دوی څارنه ډیره مهمه او اړینه ګڼل کیږي. د کمکي بستو لپاره د مکانیزم په رامنځته کولو کې د ګذر وکیلانو اماده ګۍ او همکارۍ ته پوره اړتیا ده، چې د ګذر وکیلانو هم په دې برخه کې له خپله اړخه د همکارۍ ژمنه کړې ده. ټاکل شوې ده چې ډیر ژر د کابل ښار په کچه د ملي دسترخوان پروګرام د کمکي بستو ویش پیل شي.
