د کابل ښاروالۍ د مارکیټونو د تنظیم او چاپیریالي روغتیا ریاست له لوري په دوه وروستیو میاشتو کې د افغانستان د کسبه کارانو خونې په همغږۍ او د اړوندو ادارو په همکارۍ د ۲۲ ګونو ناحیو په کچه په بازارونو کې د خوراکي توکو له څرنګوالي څارنه دوام لري. تر اوسه له مارکیټونو او د ناحیو له منډوي ګانو څخه (۶۹۷۷) کسان د (۱۷۸۸۵۲۰) یو میلیون اوه سوه اته اتیا زره پنځه سوه شل افغانیو په ارزښت جریمه شول او راټول شوی محصول د کابل ښاروالۍ بانکي حساب ته داخل شو. د یادونې وړ ده چې د ۱۴۰۰ مالي کال له پیل د غويي میاشتې تر ۱۲ نیټې د چاپیریالي روغتیا ریاست له لوري ۱۳۹۸۱کیلو ګرامه تیر وخته او بې کیفیته خوراکي توکي راټول شوي چې له دې ډلې ۴۷۱۰ کیلو ګرامه لمنځه وړل شوي او ۴۹۲۲ کیلو ګرامه نور یې راټول شوي او ټاکل شوې ده لمنځه یوړل شي.
