له مودو وروسته او د قلعه زمان خان شپیته متره سړک د اصلي کرښو په بشپړیدو سره نن د یاد سړک د یو شمیر پاتې برخو د قیر اچولو کار په بشپړیدو سره ټاکل شوې ده په نیږدې ورځو کې له بنایۍ سیمې سره ونښلول شي. د قلعه زمان خان شپیته متره سړک د ساختمان کار له بشپړیدو سره چې د کابل ښاروالۍ یو لومړیتوب وو د ۳.۵ کیلو مترو په اوږدوالي او ۶۰ متره پراخوالي سره په څلورو اصلي کرښو کې د شپاړلسمې ناحيې په سیمه کې د کابل ښاروالۍ د کار،ساتنې او مراقبت ریاست له لوري په بنسټیزه توګه د جوړیدو په حال کې دی. یاد سړک د ښار مرکزي برخې له جنوب ختیځ زون سره نښلوي چې په بشپړیدو سره به یې د سیمو له نښلیدو سربیره اقتصادي ودې ته زمینه برابره شي او د کارته نو او بګرامیو سیمې په ترافیکي ګڼه ګوڼه کې به کموالی راشي. نښلوونکې لارې او سړکونه د متمدنې نړۍ له رګونو شمیرل کیږي،ځکه ټولې اقتصادي او ټولنیزې ودې ور پورې تړلې دي. د سړکونو رغول او بیا رغول به په کابل ښار کې ټولنیزو او اقتصادي بدلونونو ته زمینه برابره کړي او راتلونکې ته به خلک هیلمن کړي.
