په ښاري مدیریت کې د مسئولیت پیژندلو او د چاپیریالي ستونزو د حل په موخه پنجشنبې د ۱۴۰۰ کال د غبرګولي په ۶ نېټه د کابل ښاروال محمد داود سلطانزوی او د کاروان پوهنتون د محصلانو او استادانو ترمنځ دخبرو اترو مخامخ پروګرام ترسره شو او هر یوه د ښار پر وړاندې د مسئولیت پیژندلو په اړه خپل ارزښتناک وړاندیزونه او نظریات د کابل ښاروالۍ له رهبرۍ سره شریک کړل. کابل ښاروال د کابل ښاروالۍ د پروګرامونو او پلانونو په اړه معلوماتو وړاندې کولو سربیره وویل چې د خبرو اترو له یاد پروګرام څخه یې موخه د همکارۍ روحیې پیاوړتیا،د مسئولیت منلو حس ژوندي کول او په بنسټیزو پریکړو په ځانګړې توګه د ښار په معیاري وده او پراختیا کې د پوهنتون د استادانو او محصلانو رول پیاوړي کول دي او د خلکو له نظرونو څخه به د پروګرامونو په تطبیق کې کار واخیستل شي. کابل ښاروال دغه راز وویل چې د ستونزو لمنځته وړلو په موخه اړینه ده ټول د ښار پر وړاندې خپل مسئولیتونه ادا کړي،څو د یو بل په مرسته په کابل ښار کې د غوره بدلون شاهدان و اوسو. د نظرونو تر تبادلې وروسته د ښاري ستونزو په حل کې د همکارۍ ژمنه وشوه،څو غوره ټولنیزې اسانتیاوې په ژوندکې تجربه کړو. د کابل ښاروالۍ او خلکو ترمنځ همغږي خورا ارزښت لري او که چیرته د یوې سیمې ټول اوسیدونکي او ښاریان د هیودانۍ مینې له مخې له ښار سره چلند وکړو،لرې نه ده چې د ټولنې ډیری ستونزې په غوره توګه حل شي. د خبرو اترو په یاد پروګرام کې د سړکونو د قیر کیدو،له پلو لارو او سړکونود خنډونو لرې کیدو او له زرغونو سیمو د ساتنې په برخه کې اندیښنې شریکې شوې او د ښاري ستونزو د حل په برخه کې استادانو او محصلانو له لوري وړاندې شوي نظرونه او وړاندیزونه یادداشت شول چې د کابل ښاروالۍ د رهبرۍ له لوري به په بیلابیلو پړاونو کې ورته رسیدنه وشي. کابل ښاروال ژمنه وکړن چې د دوی له وداندیزونو به د کابل ښاروالۍ په راتلونکو پلانونو کې ګټه پورته شی او داسې پروګرامونه به په راتلونکې کې په نورور پوهنتونونو کې هم ترسره کړي.
