د کابل ښاروالۍ د ټولنیزو او فرهنګي چارو مرستیال څیړنوال محمد فاضل شریفي د شهیدانو او معلولینو چارو وزارت د پروګرامونو او همغږۍ له مرستیالې آغلې صبرۍ اندړ سره په داسې حال کې چې د معلولیت لرونکو وګړو د ټولنو استازو هم ګډون درلود، د معلولیت لرونکو وګړو د ستونزو په اړه بحث او خبرې اترې وکړې او اړینې پریکړې یې ترسره کړې. په پیل کې د معلولیت لرونکو وګړو په استازیتوب آغلې اندړ د فزیکي او ټولنیزو اسانتیاو په برخه کې د معلولیت لرونکو وګړو ستونزې د کابل ښاروالۍ له مسئولانو سره شریکې کړې. د کابل ښاروالۍ د ټولنیزو او کلتوري چارو مرستیال وویل چې د ستونزو په حل کې د دوی ټولو مسئولیت منل او ترسره کول اړین دي او د کابل ښاروالۍ د رهبرۍ په استازیتوب یې دوی ته د هر راز مرستې ډاډ ورکړ. ښاغلي شریفي وویل چې عمومي ځایونو ته د معلولیت لرونکو وګړو د اسانتیاو لپاره په هره دولتي او شخصي رغونه کې اسانتیاوې په نظر کې نیول شوې دي او د دې ترڅنګ به د دوی د نورو ستونزو د حل په برخه کې کوټلي ګامونه پورته کړي.
