د کرونا وبا له خپریدو څخه د مخنیوي،د چارو د ښه ترسره کیدو او همغږۍ په موخه د کابل ښاروالۍ د ټولنیزو او کلتوري چارو د مرستیال څیړنوال محمد فاضل شریفي په مشرۍ د کرونا وبا له خپریدو څخه د مخنیوي په موخه د ناحیو د ښځو او ځوانانو شورا له استازو سره د همغږۍ غونډه ترسره شوه او په یو شمیر مسایلو خبرې اترې وشوې. ښاغلي شریفي له کرونا وبا سره په مبارزه کې له ګذر وکیلانو د همکارۍ غوښتونکی شو او په خپلو خبرو کې یې وویل چې د ګذر وکیلان د خلکو او ادارو ترمنځ د نښلونکي پل حیثیت لري او تل یې په ښاري مدیریت کې غوره رول لوبولی دی. هغه زیاته کړه چې اړتیا ده اوس مهال دوی له کرونا وبا سره د مبارزې په برخه کې د جوماتونو او کور په کور خبراوي په وسیله خپل غوره رول ادا کړي او ټول پوهه کړي څو په غونډو کې له ګډون ډډه وکړي او روغتیايي کړنلارې او سپارښتنې په پام کې ونیسي. د ښځو او ځوانانو شورا استازو په خپلو خبرو کې بیا له کرونا وبا سره د مبارزې په برخه کې خپل وړاندیزونه او نظرونه د کابل ښاروالۍ له رهبرۍ سره شریک کړل، چې کابل ښاروالي د دوی نظرونه د درنښت وړ بولي. دوی په ټول توان له کرونا وبا سره د مبارزې په برخه کې د همکارۍ ژمنه وکړه. په پای کې د اساتیاو رامنځته کیدو او د ښاري تاسیساتو لپاره د پلانونو جوړولو په اړه اړوند څانګو ته ځانګړې لارښوونې ترسره شوې
