د افغانستان اسلامي امارت د کابل ښاروالۍ د چارو مخته وړلو په موخه کمیسیون جوړ کړ، چې مشري یې مولوي حمدالله نعماني کوي. یاد کمیسیون به خپلې چارې سر له سبا د یک شنبې په ورځ لومړیتوبونو ته په کتو پیل کړي. کابل ښاروال محمد داود سلطانزوی په دې حساسو شرایطو کې د یادې ادارې د کارکوونکو کړنې وستایلې او له دوی یې وغوښتل څو د ښاري خدمتونو په وړاندې کولو کې نورې هڅې او کوښښونه هم وکړي. ورته مهال مولوي حمدالله نعماني چې د کمیسیون غړي هم ورسره وو وویل چې، په پوره همغږۍ به یو د بل ترڅنګ د ښاریانو د هوساینې او د ښار د آبادۍ لپاره کار کوي. دغه راز د اسلامي امارت پلاوي د کابل ښاروالۍ له ټولو کارکوونکو(ښځینه او نارینه) څخه وغوښتل چې ښځینه دې د اسلامي حجاب په پام کې نیولو سره سر له سبا خپلو دندو ته حاضر شي او ټول دې په نورماله توګه خپل دندو ته دوام ورکړي.
