سلګونه تنه هغه هیوادوال چې له ولایتونو کابل ته را کډه شوي دي او د څلورمې ناحیې اړوند په نوي ښار پارک کې په بیلابیلو دلایلو د څه مودې راپدیخوا میشت دي، د پارک زرغورنتیا او تاسیساتو ته یې زیان اړولی دی. هیله ده څو اړوند ادارې دوی ته ځانګړي ځای وټاکي،څو دې ځای ته له ډیر زیان اوښتو مخنیوی وشي. اوس مهال د یاد پارک یو شمیر ونې او نور تاسیسات ویجاړ شوي دي او که چیرته دوی له دې ځایه ونه لیږدول شي نو کیدی شي دې ځای ته ډیر زیان و رسیږي او په یو خرابه بدل شي. مسئولانو د یاد پارک د زرغونتیا او ښکلا په موخه ډیر زیار ګاللی دی،چې په وروستیو کې د یاد پارک د ۹۵۰۰ په پراخوالي برخه چمن کاري شوې ده او دغه راز د ۱۵۰۰ مترو په اوږدوالي د یاد پارک سیمه د خړوب په موخه لوله کشي شوې ده. د نوي ښار پارک ټولټال ۸۲۳۴۸ متر مربع پراخوالی لري او د کابل ښار له مهمو پارکونو شمیرل کیږي. د نوي ښار پارک د زرغونتیا او ساتنې برخې مسئولانو کډوالو ته ځانګړې لارښونې کړې دي،څو یاد پارک زرغونتیا او تاسیساتو ته زیان ونه رسوي او له دوی یې غوښتي د یاد پارک تاسیساتو او زرغونتیا ساتلو ته په جدي توګه پاملرنه وکړي.
