د کابل ښاروالۍ د زرغونتیا برخې مسئولان د کرنې او اوبو لګولو وزارت د مسلکي کسانو په مرسته د پغمان تپې په قوریه کې د بیلابیلو نیالګیو د ساتنې او پالنې په برخه کې هڅې کوي. د کابل ښار د ښکلا او زرغونتیا او دغه راز د نیالګیو کینولو موسم ته د ښې تیارۍ په موخه په یاده قوریه کې بیلابیل نیالګي کینول شوي او له هغو دوامداره ساتنه کیږي. په یادو نیالګیو کې مورپان،چنار،ناجو، دیوال بید او بیلابیل ډول ګلان شامل دي چې په معیاري او مډرنه توګه د ودې په حال کې دي او ټاکل شوې ده د نیالګیو کینولو په موسم کې به د سړکونو په غاړو، ګلدانونو، تپو او د ناحیو په کچه په بیلابیلو سیمو کې کینول شي، چې ورسره به د ښار ښکلا او زرغونتیا غوره بدلون وکړي او په دې توګه به د هوا له ککړتیا څخه مخنیوی وشي.
