د کابل ښاروالۍ د داخلي پلټنو ریاست آماده دی څو د یادې ادارې له بیلابیلو څانګو څارنه وکړي او د داخلي پلټنو د رئیس مولوي عبدالحنان حقاني تر مشرۍ لاندې په ریښتنې توګه کابل ښاریانو ته خدمتونه وړاندې کړي. د یاد ریاست رئیس مولوي حقاني وویل چې د شفافیت رامنځته کولو، ځواب ویلو او د ښاریانو عریضو ته پر وخت رسیدنه کې خدمت کولو ته تیار دي او داسې لارې چارې یې تر لاس لاندې نیولې دي، چې پر بنسټ به یې د مسئولانو کړنې غښتلې او له بل لوري د ښاریانو رضایت ترلاسه شي. که چیرته د ښاریانو عریضو ته په وخت رسیدنه وشي او یایې په بیلابیلو بهانو کارونه وځنډوي، ښاریان کولای شي خپل شکایت یاد ریاست ته وړاندې کړي. نوموړي وویل چې تر اوسه یې د لسګونه جریبه ځمکې د غصب، ودانیزو سرغړونو، کم کارۍ او وظیفوي غفلت په اړه شکایتونه ترلاسه کړي چې ډیر ژر به ورته رسیدنه او په اړه به یې اقدام وشي.