د ښار د ښکلا او سمسورتیا په موخه د نیالګیو کینولو کمپاین په لړ کې د دریمې ناحیې په کچه د پل سرخ په هغو سیمو کې چې مخکې له لرګیو او ذغال پلورونکو آزادې شوې وې او تر غصب لاندې وې د نیالګیو کینول پیل شول. د کابل ښاروالۍ د زرغونتیا ریاست مرستیال نقیب الله فکوري وايي، د ښار د ښکلا ا و سمسورتیا لپاره هڅې کوي، څو په کابل ښار کې په زرګونو نیالګي او نباتي بوټي کینوي. نوموړي له کابل ښاریانو وغوښتل څو د یادو نیالګیو د ساتلو په برخه کې له کابل ښاروالۍ سره همکار و اوسي او چاته اجازه ور نه کړي څو یادو نیالګیو ته زیان و رسوي. د نیالګیو کینولو کمپاین د کابل ښاریانو دروند هرکلی له ځان سره درلود او دوی ژمنه کړې څو د یادو نیالګیو په ساتلو او پالنه کې مرسته وکړي. د پل سرخ سیمې اوسیدونکی امان الله وايي، د نیالګیو کینول د هوا د ککړتیا په کمولو کې مرسته کوي او د کابل ښاروالۍ له دې نیک اقدام یې ستاینه وکړه. د یادې سیمې د ګذر وکیل نظام الدین وویل چې مخکې له دې په یاده سیمه کې لرګیو او ذغال پلورونکو په ناقانونه توګه فعالیت کاوه چې د سیمې د اوسیدونکو په همکارۍ او د کابل ښاروالۍ په هڅو دا سیمه له غاصبانو پاکه شوه. د ګذر وکیل وویل چې نوموړي د سیمې ټولو اوسیدونکو ته خبر ورکړی څو د نیالګیو په ساتلو او پالنه کې مرسته وکړي او ماشومانو او څارویو ته اجازه ورنه کړي څو یاد نیالګي زیانمن کړي. د کابل ښاروالۍ د نیالګیو کینولو کمپاین د کب له لومړی نیټې پیل شوی او د دې میاشتې تر پایه به دوام ولري او ټاکل شوې ده د کابل ښار په کچه زرګونه نیالګي او نباتي بوټي کینوي.