د نیالګیو کینولوکمپاین پر دوام د اولسمې ناحیې په بیلابیلو سیمو کې سلګونه نیالګي کینول شول؛ ښاریانو د نویو نیالګیو کینولو د خړوب او ساتنې په برخه کې مسئولانو ته د همکارۍ ډاډ ورکړ. د یادې ناحیې مشرانو وویل چې موږ هغه وخت په ښاري چارو کې بریالي کیدی شو، څو ښاریان د ښار په ښکلا، زرغونتیا او پاکۍ کې له کابل ښاروالۍ سره همکار و اوسي. د یادې ناحیې رئیس مولوي عبدالباري زیاته کړه چې په دې ناحیه کې د دې ترڅنګ چې د زرغونتیا ریاست له لوري سلګونه نیالګي کینول شوي، ښاریانو هم د خپلو ملکیتونو مخې ته د نیالګیو په کینولو کې برخه اخیستې ده.