د کابل ښاروالۍ د ټولنیزو او کلتوري چارو مرستیال مولوي حبیب الرحمن منصور د څلورمې ناحیې اړوند ښاروالۍ بلاکونو په پارک کې د نیالګیو کینولو مراسمو پرمهال وویل چې د نیالګیو او ونو په ساتلو او پاللو کې ټول مسئولیتونه لرو او باید د غوره ښاري مدیریت په موخه یو بل ته لاس ورکړو. نوموړي ټینګار وکړ چې ګذر وکیلان کولای شي په ځانګړې توګه د ښار په ښکلا، زرغونتیا او چاپیریال ساتنه کې غوره رول ولوبوي. د ټولنیزو او کلتوري چارو مرستیال دغه راز زیاته کړه چې اړینه ده د ټولنیزو وضعیت غوره کیدو، چاپیریالي او ټولنیزو آسانتیاو رامنځته کولو او ښاري سرغړونو لمنځه وړلو په برخه کې ټول له کابل ښاروالۍ سره همکار و اوسو. د سیمې اوسیدونکو د کابل ښاروالۍ له لوري د نیالګیو کینولو چارو د هرکلي ترڅنګ، د یادې ادارې له ټولو پروګرامونو او پلانونو ملاتړ څرګند کړ. په یادو مراسمو کې مسئولانو او ښاریانو سلګونه نیالګي کینول او د خړوب لپاره یې هم ژمنه وکړه.