د افغانستان بانک له لوري په بهر کې د افغانستان د اسعاري زیرمو د مدیریت او خلاصون په موخه د ۱۴۰۱ کال د کب په ۱۰ نیټه په زرنګار پارک کې د ( افغانان له خپلو مسلمو حقونو مه برخې کوئ) ترسرلیک لاندې د یاد بانک د رئیس، د کابل ښاروالۍ د مرستیال مولوي عصمت الله عاصم او یو شمیر نورو چارواکو په ګډون انځوریز نندارتون پرانیستل شو. یاد نندارتون په بهر کې د افغانستان د اسعاري زیرمو د مدیریت په موخه څو د افغانستان بانک په واک کې ورکړل شي، په لاره اچول شوی دی او د انځورونو له لارې د افغانانو غوښتنې او فریاد تر بهرنیانو رسوي. د افغانستان بانک د ټولنیز عدالت د تامین او خلکو ته د خدمت لپاره ژمن دی او د دې مدني حرکت له لارې هڅه کوي ، څو د بشري حقونو ادارو، ملي او نړیوالو رسنیو او مرسته کوونکو هیوادونو ته پیغام ورکړي، چې افغان کړیدلی ولس له یاده ونه باسي.