د کابل ښاروالۍ د کلتوري چارو ریاست له لوري د کابل ښاروالۍ د ټولنیزو او فرهنګي چارو د مرستیال مولوي حبیب الرحمن منصور په مشرۍ، د ۱، ۲، ۳، ۴، ۵ ،۶، ۷ ۹، ۱۰، ۱۱ او ۱۳ ناحیې له ځوانانو او مسئولانو سره د غوره سیمه ایزې حکومتوالی په موخه د همغږۍ غونډه ترسره شوه. د کابل ښاروالۍ د ټولنیزو او کلتوري چارو مرستیال وویل چې ځوانان د ټولنې د ځواکمنې برخې په توګه د آبادۍ او پرمختګ په برخه کې غوره رول لوبولی شي او له دوی یې وغوښتل څو د خپلې ناحیې په کچه شته ستونزې په ګوته او پر وخت یې له مسئولانو سره د حل په موخه شریکې کړي. د کابل ښاروالۍ د کلتوري چارو رئیس قاري ولي ګل جواد بیا د غونډې موخه د ځوانانو او مسئولانو ترمنځ دغوره همغږۍ رامنځته کول وبلل. د ناحیو ځوانانو په نیغه توګه خپلې ستونزې له مسئولانو سره شریکې کړي او د حل په موخه یې د اړینو اقداماتو غوښتنه وکړه. دوی ژمنه وکړه چې له کابل ښاروالۍ سره د ملاتړو په توګه په ټولو برخو کې همکاري کوي. د یادونې وړ ده چې تر اوسه د بیلابیلو ناحیو له ځوانانو سره دا ډول غونډې ترسره شوې دي چې غوره پایلې یې درلودې او دا لړۍ روانه ده.