د کابل ښاروال مولوي عبدالرشید تر مشرۍ لاندې د کابل ښاروالۍ د کار، ساتنې او مراقبت، استملاک، پلان پالیسي او یو شمیر نورو ریاستونو له مسئولانو د ستونزو پیژندلو او ورته د حل لارو چارو موندلو په اړه د همغږۍ غونډه ترسره شوه. په پیل کې د ګډون کوونکو ریاستونو مسئولانو، د حل په موخه خپلې ستونزې له کابل ښاروال سره شریکې کړې. کابل ښاروال د پروژو په پلي کولو او تخنیکي برخو کې د مسئولانو ستونزې واوریدې او دوی ته په یو شمیر برخو کې اړینې لارښونې وکړې. نوموړي وویل چې تخنیکي ریاستونه باید تر پخوا ښه د عمراني او ټولګټو پروژو پلي کولو ته آماده و اوسي، څو په دې توګه له پروژو د ښاریانو رضایت ترلاسه شي. مسئولانو کابل ښاروال ته ډاډ ورکړ چې د ۱۴۰۱ کال پلان شوې پروژې به په پوره دقت او چټکۍ سره په معیاري توګه پلې کړي.