د کابل ښاروالۍ د ښاري خدمتونو او چاپیریال ساتنې د مرستیال مولوي محمد خالد سجستاني په مشرۍ د څاوریو د پلور او په ۲۲ ګونو ناحیو کې د اختر په ورځو کې د قربانیو له امله د رامنځته کیدونکو کثافاتو د مدیریت په موخه د یو شمیر مرکزي ریاستونو له رئیسانو سره د همغږۍ غونډه ترسره شوه. د کابل ښاروالۍ د ښاري خدمتونو او چاپیریال ساتنې مرستیال تر بحثونو وروسته څرګنده کړه چې، ناحیې دې له مرکزي ریاستونو سره په همغږۍ، د ښار په پنځو زونونو کې د څاوریو د پلور لپاره د ځانګړو ځایونو ټاکلو او کثافت دانیو د ایښودلو لپاره چمتو و اوسي؛ څو له یوه لوري ښاري تاسیسات زیانمن نشي او له بل لوري د تنظیف ریاست وکولای شي په غوره توګه له قربانیو رامنځته کیدونکي کثافات راټول او له ښاره د باندې و لیږدوي. نوموړي زیاته کړه چې، څاوري پلورونکي دې وپوهول شي، څو په عمومي ځایونو کې د څارویو له پلور ډډه وکړي، ځکه د ښاري تاسیساتو د زیانمنیدو سبب ګرځي. د ښاري خدمتونو او چاپیریال ساتنې مرستیال ټینګار وکړ چې له دې کار څخه دې منظمه او دوامداره څارنه وشي او له سرغړونکو سره دې جدي قانوني چلند وشي. د یادونې وړ ده چې کابل ښاروالي د اختر په ورځو کې د څاوریو د پلور لپاره په پنځو زونونو کې ځانګړي ځایونه ټاکي، څو له یوه لوري څاروي پلورونکي وکولای شي ډاډه فعالیتونه ترسره کړي، او له بل لوري هغه ښاریان چې غواړي د قربانۍ لپاره څاروي وپیري، په آسانه توګه یې له نیږدې پتو او ځایونو ترلاسه کړي.