پښتونستان څلورلارې چې د کابل په زړه کې موقعیت لري، یوه له تاریخي څلورلارو څخه ده، چې په وروستیو کې یې یو شمیر برخې نړیدلې او زیانمنې شوې وې او د اوبو فوارې یې غیر فعاله وې. همدې ارزښت ته په کتو د کابل ښاروالۍ د رهبرۍ په ځانګړې پاملرنه د یادې څلورلارې د اوبو فوارې بیا ورغول شوې او نن د ۱۴۴۳ قمري کال د ذوالقعده په ۹ نیټه د کابل ښاروالۍ د مالي او اداري چارو د مرستیال الحاج مولوي سیدعصمت الله عاصم له لوري ګټې اخیستنې ته وسپارل شوې. د کابل ښاروال مرستیال وویل چې، په ښار کې د ښاري ښکلا او بیارغونې پروژو پلي کول دوام لري؛ ځکه ښاري ښکلا کولای شي ښاریانو ته ښه احساس ورکړي. د پښتونستان څلورلارې د بیارغونې په چارو کې د اوبو فوارو د تلې چپس کاري، رنګ، د کټارو او پلو لارو بیارغونه، د اوبو فوارې فعالول او د څلورو خواو تنویر شامل دي. کابل ښاروالي د ټولګټو او زیربنايي پروژو د پلي کولو ترڅنګ، ژمنتیا لري څو د ښار په بیلابیلو برخو کې ښاري ښکلا رامنځته کړي.