لیدل کیږي چې له څه مودې راپدیخوا یو شمیر فرصت غوښتونکي او لنډغر په کابل ښار کې د اوبو د لښتیو له سر اوسپنیزې جالۍ یا پوښ غلا کوي او تر اوسه یې دا کار په بیلابیلو ناحیو کې ترسره کړی دی. په دې توګه یادو کسانو ته ۱۰ ورځې وخت ورکول کیږي، څو هر ډول د اوبو د لښتیو اوسپنیزې جالۍ او پوښ که ورسره وي، کابل ښاروالۍ یا اړوند ناحیې ته وسپاري، له دې پرته دغه جالۍ چې یوازې په دولتي پروژو کې کارول کیږي بل ځای د کارولو وړ نه دي. د یادو جالیو په ثابته توګه ساتل او یا ټوټه کول لویه ښاري سرغړونه بلل کیږي او سرغړونکي به تر عدلي تعقیب لاندې ونیول شي. دا چې کابل ښاروالي دا موضوع په جدي توګه څيړي، په دې برخه کې د ښاریانو او امنیتي سرتیرو مرستې ته هم جدي اړتیا لري. له ټولو ښاریانو په درنښت غوښتنه کیږي، څو د داسې سرغړونو لیدلو او یاد پیر او پلور پر وخت کابل ښاروالۍ ته خبر وکړي او خپل دیني او اخلاقي مسئولیت ادا کړي. د داسې پیښو لکه د فلزي جالیو او پوښ د غلا، ویجاړولو او پلورلو سرغړونکي د ښار جوړولو او ځمکو قانون د اتلسمې مادې د پنځمې فقرې له موادو سره سم، مجبور دي چې د توکو اصلي بڼې ته په کتو څلور چند جریمه ورکړي.