د کابل ښاروالۍ د کلتوري چارو ریاست او د علامه فیضاني کتابتون په نوښت په شهر نو پارک کې د کتاب له اونۍ د نمانځنې او کتاب ویلو ته د ښاریانو د هڅونې په موخه اونیز د کتاب نندارتون پرانیستل شو. د کابل ښاروالۍ د کلتوري چارو رئیس قاري ولي ګل جواد وايي، کتاب غوره ملګری او د انسان تلپاتې یار دی او دا پروګرام مطالعې او کتاب ویلو ته د ښاریانو د هڅونې په موخه ترسره کیږي. نوموړي دغه راز زیاته کړه چې د کتاب په وسیله کولای شو د هیواد شته ستونزې حل کړو. د کلتوري چارو رئیس د داسې نندارتونونو په جوړولو کې د هر راز مرستې ژمنه وکړه او زیاته یې کړه چې، دا ډول نندارتونونه به په نورو ناحیو کې هم ترسره شي.