د لوی اختر په ورځو کې د څارویو حلالولو له امله د رامنځته کیدونکو کثافاتو د غوره مدیریت په موخه له دیني عالمانو، ګذر وکیلانو او د ځوانانو شورا له استازو سره د عامه پوهاوي غونډه ترسره شوه. په غونډه کې د کابل ښاروالۍ د ښاري خدمتونو او چاپیریال ساتنې مرستیال مولوي محمد خالد سجستانی له عالمانو، ګذر وکیلانو او ځوانانو وغوښتل، څو دوی په خپلو اړوند سیمو کې ښاریانو ته ورسوي چې، څاروي د کابل ښاروالۍ له لوري له ټاکل شویو ځایونو وپلوري او د اختر په ورځو کې د څارویو له امله رامنځته کیدونکي کثافات په ټاکل شویو ځایونو کې واچوي. د غونډې ګډونوالو په خپلو خبرو کې له کابل ښاروالۍ سره د اختر په ورځو کې د کثافاتو د مدیریت په اړه د مرستې کولو ژمنه وکړه او زیاته یې کړه چې هڅه به وکړي څو دلته وړاندې شوي معلومات په خپلو سیمو کې له ښاریانو سره شریک کړي. د ښاري خدمتونو په ټولو برخو کې د ښاریانو په ځانګړې توګه د دیني عالمانو، ګذر وکیلانو او ځوانانو رول مهم بلل کیږي ځکه دوی د ښاریانو او مسئولانو ترمنځ د ارتباطي پل حیثیت لري. کابل ښاروالۍ سږ کال د ښاري تاسیساتو د ساتنې، د ناروغیو له خپریدو څخه د مخنیوي او ښاریانو ته د آسانتیاو برابرولو په موخه د کابل ښار په بیلابیلو زونونو کې د څارویو پلورلو لپاره ځانګړي ځایونه ټاکلي دي. د غونډې په وروستی برخه کې د اختر په ورځو کې د کثافاتو د مدیریت په موخه د کابل ښاروالۍ له لوري ترتیب شوي معلومات په ګډونوالو وویشل شول.