د کابل ښاروالۍ د مالي او اداري چارو د مرستیال الحاج مولوي سید عصمت الله عاصم، د پلان جوړونې او ښاري پراختیا مرستیال ډاکتر صدرالدین تاجک، د ښاري خدمتونو او چاپیریال ساتنې مرستیال مولوي محمد خالد سجستاني او د کابل ښاروالۍ د تخنیکي مسئولانو په ګډون د شهرنو پارک د معیاري بیارغونې په اړه تخنیکي غونډه ترسره شوه. له بحث او خبرو اترو وروسته پریکړه وشوه څو د یاد پارک د زرغونتیا د پراخولو، د پلو لارو د بیارغونې، کانټین، سپورتي لوبغالو، د اوبو فوارو، د اوږدو چوکیو د نصب، معیاري کټارو او ګلدانونو جوړولو په موخه اړینې کړنې ترسره شي. د شهرنو پارک ۹۲۳۴۸ متر مربع پراخوالی لري او د کابل ښار یو له مهمو پارکونو شمیرل کیږي. د شهرنو پارک د بیارغونې په موخه به تخنیکي او فني مطالعات ډیر ژر پیل شي او دا پارک به په یوه مناسب تفریحي ځای بدل شي.