د کابل ښاروالۍ له لوري د هیواد د بیلابیلو پرګنو ترمنځ د یوالي د ټینګښت او د ا.ا.ا له نظام څخه د ملاتړ په موخه د ( شعر شپه) ترسرلیک لاندې فرهنګي او ادبي پروګرام ترسره شو. په دې ادبي او شعري پروګرام کې استادانو، شاعرانو، لېکوالانو، ژورنالیستانو او د کابل ښاروالۍ مشرتابه ګډون کړی وو. لومړی د کابل ښاروالۍ د کلتوري چارو رئیس قاري ولي ګل جواد ګډونوالو ته ښه راغلاست ووایه او هیله یې وښوده څو دا د ادب او شعر شپه ګډونوالو ته ښه خاطره جوړه شي. نوموړي د شعر شپې پروګرام موخه د فرهنګي او ادبي ارزښتونو ساتل، یو بل منل او د هیواد د پرګنو ترمنځ یوالی یاد کړ. وروسته د هیواد د بیلابیلو ولایتونو او ژبو شاعرانو د هیودانۍ مینې، یوالي، ملي ارزښتونو، آزادۍ او آبادۍ په اړه شعرونه واورول او غوښتنه یې کړه چې دا ډول ناستې باید ډیرې شي، ځکه په دې توګه د هیواد فرهنګ، ادبیاتو او تمدن ته درناوی کیږي. د شعر شپه تر ډیره د مینې او ورورولۍ په فضا کې په شعرونو رڼه وه.