د کابل ښاروالۍ د خپرونو او عامه پوهاوي ریاست له لوري له ګذر وکیلانو سره د عامه پوهاوي غونډو پر دوام، د لومړۍ او دویمې ناحیې له ګذر وکیلانو سره د کابل ښاروالۍ د ټولنیزو او فرهنګي چارو مرستیال مولوي حبیب الرحمن منصور په مشرۍ د همغږۍ غونډه ترسره شوه. د کابل ښاروالۍ د ټولنیزو او فرهنګي چارو مرستیال مولوي حبیب الرحمن منصور بیا په خپلو خبرو کې د ګذر وکیلان د خپلو سیمو مشران یاد کړل چې په وینا یې د ګذر وکیلانو له همکارۍ پرته کابل ښاروالۍ نشي کولای ټولو چارو ته ورسیږي. نوموړي له ګذر وکیلانو وغوښتل څو په پوره ریښتینولی، ژمنتیا او احساس خپل مسئولیتونه ادا کړي. د کابل ښاروالۍ مرستیال دغه راز زیاته کړه چې دوی له ګذرونو د څارنې لړۍ پیل کړې ده او هغه وکیلان چې غوره کړنې یې ترسره کړې وي د کابل ښاروالۍ له لوري به وستایل شي. ورپسې په خپل وار د زرغونتیا ، تنظیف او د چاپیریالي روغتیا او چاپیریال ساتنې ریاستونو له لوري په اړوند برخو کې اړین معلومات له ګذر وکیلانو سره شریک شول. د ګذر وکیلانو په استازیتوب سید حسن پرویزي ژمنه وکړه چې له کابل ښاروالۍ به اوږه په اوږه د ښار د ښکلا، آبادۍ او پاکۍ په برخه کې کار کوي. ګذر وکیلان د مسئولانو او ښاریانو ترمنځ د پل حیثیت لري او د ښار په هره برخه کې یې رول ګټور او اړین دی.