د ښار په مرکزي برخو کې غوره ښاري نظم ته د رسیدو په موخه د کابل ښاروالۍ د لومړی ناحیې او د زون د ناحیو د رئیس محمد عالم عاصم او د لسمې ناحیې ناحیې د رئیس مولوي نور الوهاب له لوري د شهرنو، وزیرمحمد اکبرخان، عامې روغتیا څلورلارې، هوايي ډګر سړک، هنګرها څلورلارې او وزیر آباد سیمو کې له ښاري نظم څارنه وشوه. د څارنې په لړ کې هغه ګرځنده کراچۍ، لاسي توکي پلورونکي، موټر مینځونکي، لیني موټر او تیل پلورونکي چې د پلو لارو او سړکونو د بندیدو او د ښاري نظم ګډوډیدو سبب ګرځیدلي وو تنظیم او ځانګړو ځایونو ته ولیږدول شول. هغه اصناف او هټیوال چې د هټیو مخې ته یې ناقانونه رغونې کړې وې، تادیب او جریمه شول او اخطار ورکړل شو څو بیا ځل د ښاري بې نظمۍ سبب ونه ګرځي. په همدې توګه له ګرځنده کراچیو هم څارنه وشوه او هغوی وپوهول شول څو له ښاري اصولو او قوانینو سره برابر فعالیتونه ترسره کړي. د کابل ښاروالۍ مسئولان هڅه کوي څو په لسمه ناحیه کې د ښاري نظم لپاره خپلې هڅې دوامداره وساتي او یاده ناحیه په بشپړه توګه له بې نظمیو پاکه کړي.