د کابل ښاروالۍ د مشرتابه په تخنیکي غونډه کې پریکړه وشوه، څو د ښار په بیلابیلو زونونو کې د څارویو حلالولو لپاره ځانګړي معیاري او دایمي ځایونه جوړ شي. په یاده غونډه کې د کابل ښاروالۍ د پلان جوړونې او ښاري پراختیا مرستیال ډاکتر صدرالدین تاجک، د ښاري خدمتونو چاپیریال ساتنې مرستیال مولوي محمد خالد سجستاني او د تخنیکي او فني ریاستونو رئیسانو ګډون درلود. په یاده غونډه کې د ښاري چاپیریال د سالم ساتلو، د هټیو مخې ته د څارویو له حلالولو څخه د مخنیوي او روغتیايي سپارښتنو ته په کتو د څارویو حلالولو لپاره د دایمي معیاري ځایونو د جوړولو په بحث وشو او اړینې پریکړې ترسره شوې.