د کابل ښاروالۍ مقام په وړاندیز او د ریاست الوزرا محترم مقام د حکم پر بنسټ ښاغلی انجنیر عامر یاسر د کابل ښاروالۍ د ودانیزو چارو او عامه ښاري ترانسپورت د نوي مرستیال په توګه په دنده وګمارل شو او د یو لړ مراسمو په ترڅ کې د یادې ادارې کارکوونکو ته ور وپیژندل شو. په یادو مراسمو کې د کابل ښاروالۍ د ټولنیزو او کلتوري چارو مرستیال مولوي حبیب الرحمن منصور خبرې وکړې او ویې ویل چې، ښاغلی یاسر له غوره تجربو برخمن دی او په ټاکل کیدو سره به یې د رغونې او بیارغونې پلانونو په پلي کیدو او ترافیکي نظم کې د غوره بدلون شاهدان و اوسو. ورپسې د ودانیزو چارو او عامه ښاري ترانسپورت نوي مرستیال په خپلو خبرو ډاډ څرګند کړ، چې د قوي هوډ، ارادې او علمي تجربو له مخې به کابل ښاریانو ته ریښتني خدمتونه وړاندې کوي. نوموړي د عمراني او ټولګټو پروژو په پلي کیدو کې د برابرې پراختیا پر اصل ټینګار وکړ او زیاته یې کړه چې په تیر کې محرومو ناحیو او سیمو ته به ځانګړې پاملرنه کوي. ښاغلی عامر یاسر په انجنیرۍ څانګه کې د ماسټرۍ تر کچې لوړې زده کړې لري او د تیر یوه کال په موده کې یې په بیلابیلو ادارو کې دنده ترسره کړې ده.