د پنځمې ناحیې اړوند په ده عربانو په سیمه کې د وردګو کوڅې کانګریټ چارې چې څه موده وړاندې د کابل ښاروالۍ د کار ساتنې او مراقبت ریاست له لوري پیل شوې وې،اوس یې چارې بشپړې او ګټې اخیستنې ته وسپارل شوې. دکابل ښاروالۍ دکار ساتنې اومراقبت رئیس مولوي عبدالحبیب وویل، چې یاده کوڅه په معیاري او بنسټیزه توګه د ۱۵۶ مترو اوږدوالي د ۴۰۰۰۰۰ څلور سوه زره افغانۍ په ارزښت د کابل ښاروالۍ له داخلي بودجې جوړه شوې ده. ورته مهال د سیمې اوسیدونکو د کابل ښاروالۍ وروستۍ کړنې وستایلې اوزیاته یې کړه، چې د دې کوڅې په کانګریټ کېدو سره به د سیمې د خلکو ستونزې حل او ډیر شمیر ټولنیزې او اقتصادي آسانتیاوې به رامنځته شي. کابل ښاروالي دیوې لويې خدماتي ادارې په توګه هڅه کوي، څو دښاریانو ستونزو ته په وخت ورسیږي.