د ځاني ظرفیت لوړونې او د چارو د غوره توګه ترسره کیدو په موخه د کابل ښاروالۍ د ریاستونو مرستیالانو ته د ادارې او مدیریت په اړه د عامه پوهاوي روزنیز ورکشاپ پیل شو. د کابل ښاروالۍ مقام د دفتر مشر مولوي عبدالقدیر حقاني د پیل په مراسمو کې وویل چې، دا ډول ورکشاپونه د کابل ښاروالۍ د مسئولانو لپاره خورا ګټور دي او له ګډونوالو یې وغوښتل څو په پوره علاقه او شوق په یاد ورکشاپ کې ګډون وکړي. ورپسې د ملکي خدمتونو انسټیټیوټ رئیس مولوي عبدالرحیم احسان یاد ورکشاپ د ادارې او مدیریت په برخه کې د ټولو کارکوونکو په ځانګړې توګه د نوو ګمارل شوو کسانو لپاره مهم وباله او زیاته یې کړه چې دا ډول ورکشاپونه به د کارکوونکو په ورځنیو چارو کې غوره بدلون راولي. د ادارې او مدیریت په اړه دا روزنیز ورکشاپ د کابل ښاروالۍ د بشري سرچینو له لوري د ملکي خدمتونو انسټیټیوت په مرسته د یوې اونۍ لپاره په لاره اچول شوی دی او پکې به د پروګرامونو د پلان کولو، همغږۍ، رهبرۍ، د فعالیتونو د کنټرول او نورو موضوعاتو په اړه معلومات وړاندې کیږي."