کابل ښاروال مولوي عبدالرشید د لوی څارنوال مولوي سعدالدین په مشرۍ، د اطلاعاتو او کلتور او ارشاد او دعوت وزارتونو د استازو په ګډون د کابل ښاروالۍ د فعالیتونو ارزونې په موخه له ټاکل شوي هیئت سره ولیدل او په یو شمیر موضوعاتو یې بحث وکړ. کابل ښاروال مولوي عبدالرشید د یاد هیئت هرکلی وکړ او د مسئولیت منلو کچې د لوړولو او غوره حکومتوالۍ رامنځته کولو په برخه کې یې د هر ډول همکارۍ ژمنه وکړه او ارزونه یې د نظام د ثبات او د چارو د غوره پرمختګ لپاره اړینه وبلله. نوموړي ټینګار وکړ چې د کړنلارو او قوانینو په چوکاټ کې به د خلکو ستونزو ته رسیدنه وکړي او هڅه به وکړي څو ښاري ستونزې په ښه توګه حل شي. کابل ښاروال وویل چې د مسئولانو وظیفوي غفلت ورته د منلو نه دی او زیاته یې کړه چې د ښاریانو د رضایت ترلاسه کولو لپاره اړینه ده څو ادارې په خپل مینځ کې سره همغږې او همکارې و اوسي. ورپسې د هیئت مشر مولوي سعدالدین وویل چې ارزونه او پلټنه کاري کړنې ګړندۍ کوي او د مسئولیت منلو کچه لوړي. ټاکل شوې ده یاد هیئت د غوره خدمتونو وړاندې کولو او د نظام د ثبات په موخه د کابل ښاروالۍ د فعالیتونو په اړه خپلې ارزونې پیل کړي.