د ښار په کچه د ناحیو له ګذر وکیلانو، دیني عالمانو او ځوانانو سره د ښاري فرهنګ د ودې په موخه د عامه پوهاوي غونډو پر دوام د کابل ښاروالۍ د ټولنیزو او کلتوري چارو د مرستیال مولوي حبیب الرحمن منصور په مشرۍ د اوومې، اتمې او نهمې ناحیې له ګذر وکیلانو، دیني عالمانو او ځوانانو سره د ښاري فرهنګ د ودې په موخه د عامه پوهاوي پروګرام ترسره شو. د کابل ښاروالۍ د ټولنیزو او کلتوري چارو مرستیال مولوي حبیب الرحمن منصور بیا په خپلو خبرو کې وویل چې ګذر وکیلان باید د خپلو نورو دندو ترسره کولو ترڅنګ خلک له بې لاریو منع کړي او پوهې ته یې وهڅوي، ځکه پوهه او تعلیم د ټولنې یوه جدي اړتیا ده. بیا د تنظیف او چاپیریالي روغتیا او چاپیریال ساتنې ریاست له لوري د خپلو دندو، کارونو او مسئولیتونو په اړه ګډونوالو ته معلومات وړاندې شول. د دیني عالمانو په استازیتوب شیخ محمد نور ابراهیمي خبرې وکړې او زیاته یې کړه چې، مسلمانان د ځان او ټولنې د پاکۍ ساتلو پر وړاندې مسئول دي او په دې برخه کې باید ټول خپل مسئولیتونه ادا کړي. ورپسې د ګذر وکیلانو له ډلې عبدالمحیب صافي خبرې وکړې او له کابل ښاروالۍ سره یې په ټولو برخو کې د همکارۍ ژمنه وکړه. ټاکل شوې ده یو پر بل پسې دا پروګرام د ټولو ناحیو له ګذر وکیلانو، دیني عالمانو او ځوانانو سره پلی شي.