د ښاري فرهنګ د ودې په موخه د کابل ښاروالۍ د خپرونو او عامه پوهاوي ریاست د اړيکو او عامه پوهاوي آمریت له لوري دا ځل په سیدجماالدین افغان منځني ښوونځي کې د عامه پوهاوي پروګرام جوړ شو. په دې پروګرام کې د کابل ښاروالۍ د خپرونو او عامه پوهاوي رئیس قاري واسع الله زاهد د ښاري اصولو او مقرراتو د پام کې نیولو په اړه خبرې وکړې او ویې ویل چې، اړینه ده هر یو زموږ په ښاري ژوند کې ښاري فرهنګ په پام کې ونیسي. وروسته د یاد پروګرام مسئول حاجي محمود واحدي و ویل چې په پوهنیز بهیر کې د اخلاقیاتو او دوه اړخیز درناوي په پام کې نیول زموږ د عقيدې او اسلامي لارښونو برخه ده؛ له دې کبله د ښوونځي له زده کوونکو او ښوونکو هیله وشوه څو، د ښاري پاکۍ، د زرغونو سیمو د ساتنې او له ښاري تاسیساتو د غوره ګټې اخیستنې په برخه کې له کابل ښاروالۍ سره همکار و اوسي. د ښاري فرهنګ په پام کې نیول د انساني ژوند یوه مهمه برخه ده چې د دودولو په برخه کې یې نه یوازې کابل ښاروالي؛ بلکې ټول بنسټونه، ادارې، پوهنتونونه او ښوونځي مسئولیت لري. د عامه پوهاوي په دې پروګرام کې د یو شمېر ښاري موضوعاتو په اړه ویډیويي کلیپونه نندارې ته وړاندې شول او دغه راز په زده کوونکو یو شمیر ښوونیز توکي وویشل شول.