د کابل ښاروالۍ له لوري د ملګرو ملتونو د (اسکان) دفتر په مرسته د اوولسمې ناحیې اړوند په پنځه لسم ګذر کې د (۱۱۷۱) مترو په اوږدوالي د اوبو د لښتیو په ګډون د کانګریټ کولو د دوه پروژو چارې پیل شوې. د یادو پروژو د پرانیستې په مراسمو کې د اوولسمې ناحیې رئیس مفتي عبدالباري ایقاظ وویل: کابل ښاروالۍ هڅه کوي څو د خپلو امکاناتو په کچه، د ښاریانو ټولنیزې او نورې ښاري ستونزې له منځه یوسي، چې د ښار په بیلابیلو برخو کې د ټولګټو پروژو پلي کول یې ښه بېلګه ده. نوموړي په خپلو خبروکې وویل چې، ښاریانو ته اړینه ده څو له کابل ښاروالۍ سره د پروژو په پلي کولو کې مرسته وکړي. په پام کې ده چې، د پنځه لسم ګذر په دوه برخو کې د کوچینو او لویو کوڅو دکانګریټ کولو چارې، چې یوه برخه یې ۳۲۴ متره اوږدوالی او دویمه برخه یې بیا ۸۴۷ متره اوږدوالی لري، د سړو موسم تر را رسېدو وړاندې بشپړې او ګټې اخیستنې ته وسپارل شي.