د کابل ښاروالۍ د چاپیریالي روغتیا او چاپیریال ساتنې ریاست په هڅو د څوارلسمې ناحیې اړوند په قلعه حیدرخان سیمه کې د ګچ په ۳۶ کارخانو کې د لوګي د تصفیې فلټرونه ولګول شول. د کابل ښاروالۍ د چاپیریالي روغتیا او چاپیریال ساتنې ریاست مرستیال ډاکتر مسعود فقیري وايي، چې دا کار یې د کابل هوا په ککړتیا کې د کموالي راوستو په موخه ترسره کړی دی او هڅه کوي څو ټولې د ګچ او خښتو جوړولو کارخانې، د ودونو هوټلونه، لوړ پوړیزې ودانۍ او حمامونه د لوګي د تصفیې لپاره فلټرونه نصب کړي. د سړو موسم په را رسېدو سره ښاریان د تودخې په موخه له غیر معیاري سون توکو کار اخلي او ورسره د کابل ښار هوا ککړه کیږي. د چاپیریالي روغتیا او چاپیریال ساتنې ریاست مسئولان وايي، چې د سړو په موسم کې د غیر معیاري سون توکو کارولو د مخنیوي په برخه کې هم ځانګړي پلانونه لري، څو وکولای شي تر یوه بریده د هوا د ککړتیا مخه ونیسي. د یادونې وړ ده چې اوس مهال د ګچ جوړولو کارخانې یوازې په قلعه حیدرخان سیمه کې فعالیت کوي.