د کابل ښاروالۍ د چاپیریالي روغتیا او چاپیریال ساتنې ریاست د مسئولانو له لوري د کابل ښار په بېلابېلو ناحیو کې د نږدې سلو حمامونو او سوناګانو فعالیتونه ارزول شوي دي، چې د لوګي د تصفیې فلټر د نصب له امله پکې اړین اصلاحات راغلي دي. د ارزونې په پایله کې (۲۱) حمامونه چې فعالیتونه یې د کابل ښاروالۍ له معیارونو سره برابر نه وو، وتړل شول او د ژمنې له اخیستو وروسته بېرته د فعالیت اجازه ورکړل شوه. پاتې دې نه وي چې، د کابل ښاروالۍ د چاپیریالي روغتیا او چاپیریال ساتنې ریاست کارکوونکو د حمامونو او سوناګانو مسؤلانوته یو شمېر روغتیایي لارښونې وکړې او سرغړونکو ته یې سپارښتنه وکړه څو حفظ الصحې ته په جدي توګه پام وکړي. دغه راز د حمامونو او سوناګانو د فاضلاب سیسټمونه هم و ارزول شول او د اړینو اصلاحاتو راوستو سپارښتنې ورته وشوې. د دې برخې له سرغړونکو سره جدي قانوني چلند کیږي.