کابل ژوبڼ د یوې علمي او تحقیقاتي موسسې په توګه، د زده کوونکو د علمي سفر لپاره یو مناسب ځای ده څو د ژویو د ژوند په اړه د نني نسل علمي کچه لوړه شي. د کابل ژوبڼ د ښوونې او روزنې مدیر نجیب نظري وايي: هره ورځ د کابل ښار او نورو ولایتونو له بېلابېلو ښوونځیو څخه په سلګونو زده کوونکي کابل ژوبڼ ته راځي او دوی ورته د ژویو د ژوند او ارزښت په اړه معلومات ورکوي. د نوموړي په وینا، د کابل ژوبڼ د ښوونې او روزنې څانګې د کارکوونکو له لوري زده کوونکي ښاري اصولو، له ژوبڼ څخه د لېدنې اصولو او د طبیعت د ښکلا پیژندلو ته هڅول کیږي. دغه راز زده کوونکو ته له کابل ژوبڼ څخه د لېدنې پرمهال یو شمېر مجلې او نور روزنیز توکي هم ویشل کیږي.