د نهمې ناحیې د اداري ودانۍ په انګړ کې د الفتح په نامه یو جومات تر چارو بشپړېدو وروسته د کابل ښاروال مولوي عبدالرشید له لوري په داسې حال کې چې، د سیمې مشرانو او اوسېدونکو هم ګډون درلود ګټې اخیستنې ته وسپارل شو. کابل ښاروال د یاد جومات د پرانیستې په مراسمو کې وویل چې، کابل ښاروالي د زیربناو جوړولو او خدمتونو وړاندې کولو تر څنګ د جوماتونو په جوړولو سره د معنویاتو د ساتلو لپاره هم توجه لري. نوموړي له هغو مخلصو ښاریانو چې د څه باندې دوه میلیونه افغانیو په ارزښت یې دا مسجد جوړ کړی دی، هم مننه وکړه. یاد جومات په یو وخت د سلو لمونځ کوونکو د ځایولو وړتیا لري، چې د کابل ښاروالۍ د کارکوونکو سربېره به پکې د دې ناحيې مراجعین هم لمونځ کوي. مسلمانانو تل د جوماتونو له لارې د یوالي غږ پورته کړی دی او د دې ترڅنګ ټولنیزې ستونزې یې هم له دې لارې په غوره توګه حل کړې دي. هغه څوک چې د جوماتونو په جوړولو کې برخه اخلي؛ د خدای ج د رحمت تر سیوري لاندې راځي او الله ج ورسره مرسته کوي.