د ا.ا.ا. له پیل څخه تر اوسه پورې، په پنځلسمه ناحیه کې، (۳۷۰۰۰) اړمنې کورنۍ دخوړو نړیوال سازمان له خوا دخوراکي توکو د مرستې په موخه، تر پوښښ لاندي نیول شوې دي، چې اوس مهال(۱۸۰۰۰) اړمنو کورنیو ته د خوراکي توکو دوېش لړۍ دوام لري. د پنځلسمې ناحیې رئیس عبدالبصیر خلیلي اخندزاده، چې په دغه ناحیه کې د خوړو نړیوال سازمان له خوا په اړمنوکورنیو باندې دمرستو ویشلو څرنګوالی له نږدې څاري په دې اړه وویل: کابل ښاروالۍ په دې برخه هڅه کوي، څو خوراکي توکې په سمه توګه مستحقو کورنیو ته ورسیږي. دغه مرسته شوي توکي هغو اړمنو کورنیو ته، چې مخکې دګذر وکیلانو، د سیمه اییزو شوراګانو او د اړوندو ادارو دتخنیکي ټیم له خوا تر سروې وروسته مستحق پېژندل شوې، ورکول کیږي. په دغو مرستو کې اوړه، غوړي، لوبیا او مالګه شامل دي، چې څو ځلې پر اړمنو کورنیو وېشل شوې دي.