د کابل ښار د هوا له ککړتیا څخه د مخنیوي په موخه، د کابل ښاروالۍ د چاپېریالي روغتیا او چاپېریال ساتنې ریاست کارکوونکو له لوري د چاپېریال له ساتنې څارنې روانې دي او سرغړونکي به له قانوني چلند سره مخ شي. په ودانیو کې د لوګي د تصفیې لپاره د فلټر نشتون، د ډبرو له سکرو څخه ډیره او بې ځایه ګټه اخیستنه او د نورو غیر معیاري سون توکو سوځول، د چاپېریال ساتنې د برخې سرغړونې دي. د چاپېریالي روغتیا او چاپېریال ساتنې ریاست کارکوونکو د څارنو په پایله کې د لسګونو ودانیو له مالکانو څخه، چې سرغړونې یې درلودې ژمنه واخیستل شوه او دوی ته وویل شول څو هر څه ژر د مرکز ګرمۍ سیسټم لپاره د لوګي د تصفیې فلټر نصب کړي، له دې پرته به یې د مرکز ګرمۍ سیسټم بندکړل شي.