د کابل ښاروالۍ له لوري د ملګرو ملتونو د خدمتونو ادارې ( UNOPS) په مالي ملاتړ د څلورمې ناحیې په ۱۶ م ګذر کې د ۶۰۰ مترو په اوږدوالي، د شاوخوا سل زره امریکايي ډالرو په ارزښت د کوڅو کانکریټ چارې د یو لړ مراسمو په ترڅ کې پیل شوې. په یادو مراسمو کې د څلورمې ناحیې رئیس مولوي عبدالرحمن رباني په داسې حال کې چې د امنیتي حوزې آمر او د سیمې اوسېدونکو ګډون درلود وویل چې، کابل ښاروالي ښاریانو ته د ټولنیزو او ښاري آسانتیاو رامنځته کولو په برخه کې ژمنتیا لري او د ټولګټو پروژو چارې به یو پر بل پسې پلې شي. نوموړي هیله وکړه چې د پروژو په پلي کېدو کې به ښاریان خپلې همکارۍ ونه سپموي. د یادو کوڅو او فرعي سړکونو په جوړېدو سره به نه یوازې په چاپیریالي برخه کې غوره بدلون راشي، بلکې په ژمي کې به د ښاریانو د خټو او خاورو ستونزې هم حل شي.